Prins Funs I

Proclamatie Prins Funs I

Foto: ZIPS Fotografie

Pej, 06 Januari 2018

Moge weer uch väörstèlle, bie de gratie gekaoze door de drie wieze. Alle Aesters en Aesterlingskes van  Sjaelberg, Pej,’t Hènge en zeker van de Slek, biegestange door Adjudant Peter, Vors Ton, Ambassadeur, Bestuur, lede vanne Raod van Èlf en de Hofkapel, zoawaor oze 65ste dooslustige Hoagheid, Prins Funs I, dae uch mit groate inzat en vol äövergave väör zal gaon in ’t Vastelaovesjaor 2018, óngersteuntj door de muzikale klanke,van oos eige ónvolpreze Hofkapel.

 

Prins Funs I

 

Waalgebaore Edelachbare Excellentie, mit gevolg ein Majesteit, wonendj in ’t riek van de Slekkersnake. 

Is gebaore op 29 augustus 1960 oppe  Dörpstraot es zoon van  Harie en Mia Meuwissen. 

Woontj same mit Giovanna  oppe Diekveldjstraot. 

Is vader van twieë kènjer namelik Jordy en Fiona. 

Lid van oos eige Vastelaovesvereniging De Aester Sjaelen Uul Pej. 

Rundj zien eige bedrief oppe Loup es constructie bankwirker. 

Groat aandeilhaojer in ‘t boewe en lasse van oze eige prinsewage. 

Vreuger  ein van de ster spelers bie Rios. 

Fan en hobby van alle sporte, allein bekiek d’r die vanaaf de bank.

 

Ederein dae dit huuertj, zal laeze, verstange haetj en good gevónje, det alles volges de regels en in ’t belang van eine sjoane Vastelaovendj, mót weite det: 

Ten  1e  Det de Pejjer Vastelaovendj gevierdj weurtj door de minse van de Slek, Sjaelberg, ‘t Hènge en Pej mit óngersteuning vanne ganse Vastelaovesvereniging De Aester Sjaelen Uul.        

Ten  2e   Det w’r de Diekveldjstraot gaon verangere in ein Prinsestraot.

Ten  3e   Det Prins Funs I eine sjoane vastelaovendj moog belaeve en zeker  weite det alles good kömtj.

Ten  4e   Det alle contructie van de vastelaovesoptoch rech of sjeif kónne waere gelas den kömtj det vanzelf good.

Ten  5e   Det Prins Funs I noe zelf èns baove op kan zeen wie de prinswage is gewore.

Ten  6e   Det ’t industrieterein de Loup mitte vastelaovendj gans in ’t Raod, Gael en Greun zal kluuere.

Ten  7e   Det weer mit Prins Funs I eine polonaise gaon make van ’t Hènge tót de Slek.

Ten  8e   Det de groate- en kènjeroptoch dit jaor langs ‘t Prinselikhoes van oze Prins Funs I truktj.

Ten  9e   Det de hobby’s van Prins Funs I efkes mèr zelf oppe bank mótte gaon zitte.

Ten 10e  Det es vastelaoevesdaensdig de vlag gestreke weurtj, alles good gekómme is.

Ten 11e  Det weer noe gaon aafsjloete ónger mien motto:

 

“Alles Kömtj Good!”

                     

W.G. Vastelaovesvereniging De Aester Sjaelen Uul Pej.