Proclamatie Prins Peter II
Pej, 07 Januari 2017.
Moge weer uch väörstèlle, bie de gratie gekaoze door de drie wieze. Alle Aesters en Aesterlingskes van , Slek, Sjaelberg, Pej en zeker van ‘t Hènge , biegestange door Adjudant Marcel, Vors Ton, Ambassadeur, Bestuur, lede vanne Raod van Èlf en de Hofkapel, zoawaor oze 64ste dooslustige Hoagheid, Prins Peter II, dae uch mit groate inzat en vol äövergave väör zal gaon in ’t Vastelaovesjaor 2017, óngersteuntj door de muzikale klanke,van oos eige ónvolpreze Hofkapel.
Prins Peter II
Waalgebaore Edelachbare Ekselensie, mit gevolg ein Majesteit, wonendj in ’t riek van de Sprènkhane.
Is es 8ste gebaore op 30 november 1974 oppe Slek in ein nés van 7 jónges en 2 maedjes es zoon van Lei en Annie Knoben.
Woontj same mit Tineke en zien twieë kènjer Nils en Marit oppe Kranebrokerwaeg.
Wèrkzaam bie Case Packing Systems es software engineer väör ‘t programmere van de verpakkingsmesjiener.
Lid van Sjötterie Wilhelmina Hènge, wovan hae bestuurslid, muzikant, sjötter en väörzitter is van de sjeetcommissie en hiebie ouch nag versjillende jaore käöning is gewaes.
Oethulp bie de hofkapel, ZH Noat Weg, Sjriever en componist van de Pejjer boyband de Pejjer Haop.
Groat voetbalgek is en haetj gevoetbaldj bie de Slekker Boys, Rios en FC.Hènge en noe vaste supporter is van ziene zoon Nils bie de Slekkerboys.
In 1988 jeugprins gewaes oppe Slek same mit oze graote Prins Jos I (Jos Slabbers).
Neet weg te dènke arties oppe Bóntje aovendj/middig en inspirator van ’t beruchte Slekker badmötse bal.
Begin jaore 2000 de blievendj roulerendj väörzitter van de Ummer nog nit offisjel Ummer d’r Neaver fankloep.
Ederein dae dit huuertj, zal laeze, verstange haetj en good gevónje, det alles volges de regels en in ’t belang van eine sjoane Vastelaovendj, mót weite det:
Ten 1e Det de Pejjer Vastelaovendj gevierdj weurtj door de minse van ’t Hènge, Slek, Pej en Sjaelberg mit óngersteuning vanne ganse Vastelaovesvereniging De Aester Sjaelen Uul.
Ten 2e Det de bölkes bie Sjötterie Wilhelmina mitte vastelaovendj road, gael, greun gekluuerdj zeen.
Ten 3e Det de Bóntje aovendj/middig zónger Prins Peter II es arties ouch wie vanzelf geitj.
Ten 4e Det es se mit de zwejlamp aan de kloon oethungs, vastelaovendj viere wie vanzelf ein fluitje van eine cent is.
Ten 5e Det chaos hieël leuk is, ’t daak zelfs draaf moog, mer ’t waal gezellig mót blieve.
Ten 6e Det de vastelaovendj in ’t prinseriek Pej d’r noait ummer d’r neaver zal loupe.
Ten 7e Det Prins Peter II vuntj det abrikoaze flaai nag stieëds de lekkerste flaai is en bliftj.
Ten 8e Det weer deze vastelaovendj in ’t prinseriek Pej eine gezellige chaos make van de Hoagstraot tót de Kranebrokerwaeg.
Ten 9e Det es se släötels ane vastelaovendj, dae wie vanzelf gesmeerdj löptj.
Ten 10e Det ich es inspirator van ’t roemruchte Slekker badmötsebal, vastelaovesdènsdig oetroop tót “Draag de badmöts daag”.
Ten 11e Det weer noe laeve in de broewerie gaon make ónger mien motto:
“Vastelaovendj viere, det geit wie vanzelf”
W.G. Vastelaovesvereniging De Aester Sjaelen Uul Pej.