Prins Ralph I

Foto: ZIPS fotografie

---

Moge weer uch väörstèlle, bie de gratie gekaoze door de drie wieze, biegestange door Adjudant René, Vice-Vors Stef, Bestuur, leje vanne Raod van èlf en de Pejjerstars, oze 73ste  dooslustige Hoagheid, Prins Ralph I. Óngersteuntj door de muzikale klanke van oos eige ónvolpreze Hofkapel zal hae ós, mit groate inzat en vol äövergave, väörgaon in ’t Vastelaovesjaor 2026.

Prins Ralph I,

Kastieëlhieër van Kastieëlwaeg 38 in Pej.
Gebaore op 7 april 1965 es Hazekeutel in ’t riek van de Piëlhaze.
11 Jaor geleje getrouwdj mit Sandra en gruuetse pap van Marijn, Chloë en Milan.
Zoon van Toos en Awd Prins Koos I van de Piëlhaze.
Broor van Ilse en Desirée.
Sjatbewaarder van De Aester Sjaelen Uul.
Vriewilliger achter de bar bie “Ons Genoegen” Sint Joas.
Lid van Iris II, mer is waal allergisch väör de geit.
Groate fan van de Pejjer Stars en oos eige Hofkapel.
Awd president van Kiwanis Vènraoj.
Vaste hulp van Sinterklaos mit de intoch.
Fanatiek klusser, dök mit hulp van oze leve Hieër.

Ederein dae dit huuertj, leusj, begrepe haetj en ouch haetj good gevónje,
mót in ‘t belang van eine sjoane Vastelaovendj weite:

Ten  1^ste    Det de Pejjer Vastelaovendj gevierdj weurtj door alles en ederein vanPej, Sjaelberg,’t Hènge en de Slek mit óngersteuning vanne ganseVastelaovesvereniging De Aester Sjaelen Uul.

Ten  2^de     Det Prins Ralph I de ieëste Pejjer Prins is mit ein Jeugdprinses naeve zich.

Ten  3^de     Det Prins Ralph I in ’t groatste geheim eine cursus bie Veldeke haetj gevolgdj.

Ten  4^de     Det weer dit Vastelaovessezoen “1000 sterre” in accentloos Vènraojs gaon zènge.

Ten  5^de     Det de Pejjer Stars Prins Ralph I op det leedje gaon lieëre danse.

Ten  6^de     Det 2026 ein financieel topjaor weurtj väör Vastelaovesvereniging De Aester Sjaelen Uul.

Ten  7^de     Det Prins Ralph I de ènsigste Prins is dae via eine sollicitatiebreef bie de vereniging is gekómme.

Ten  8^ste    Det de prinsewage dit jaor extra good weurtj gewasse.

Ten  9^de     Det Prins Ralph I jaore lank ’t prinsepak haetj opgehaoldj, mer noe eindelik zien eige.

Ten 10^de     Det weer dit sezoen alles, mer den ouch ech alles, gaon gaeve.

Ten 11^de     Det weer de Pejjer Vastelaovendj gaon viere ónger zien motto:

“Alles gaeve en eine sjoane Vastelaovendj belaeve”