Prins René I

Moge weer uch väörstèlle, bie de gratie gekaoze door de drie wieze,

biegestange door Adjudant Roger, Vice-Vors Stef, Bestuur, leje vanne Raod van Èllef en de Pejjerstars, oze 72ste  dooslustige Hoagheid, Prins René I.  
Óngersteuntj door de muzikale klanke van oos eige ónvolpreze Hofkapel zal hae ós mit groate inzat en vol äövergave väörgaon in ’t Vastelaovesjaor 2025.      

Prins René I,

Eine hoagheid mit käöninklik blood, wonendj oppe Clarastraot in Pej.
Gebaore op 6 november 1975 es zoon van Ben en Marlies Iedema.
Getrouwdj mit Ilona en gruuetse vader van Naomi, Justin, Lorena en Laura.
Chauffeur en manager van alle hobby’s van de kènjer.
Lid van ’t kampioensteam van Golf Biljart Club ‘t Hènge.
Gewaerdrager bie de sjötterie van ’t Hènge.
Mede-oprichter van de Potentiële Pejjer Prinse Party.
Sjriever van ziene eige sjlager “Door en door”.
Groat fan van de Pejjer Stars.
Klonetrèkker oppe Echter Kirmes.
Eine Prins dae es Vors zien wäördje wètj te zègke.

Ederein dae dit huuertj, leus, begrepe haetj en ouch haetj good gevónje,
mót in ‘t belang van eine super sjieke sjoane Vastelaovendj weite:

Ten  1^ste    Det de Pejjer Vastelaovendj gevierdj weurtj door alles en ederein van Pej, Sjaelberg, de Slek en ’t Hènge, mit óngersteuning vanne ganse Vastelaovesvereniging De Aester Sjaelen Uul.

Ten  2^de     Det Prins Renè I al blie is mit ein vaer d’r bie.

Ten  3^de     Det café’s neet hove te sloete, Prins René I geitj toch neet nao hoes.

Ten  4^de     Det mit ‘ne Jeugdprins en drie Jeugdprinsesse in ein gezin ‘t Vastelaovesvirus good is doorgegaeve.

Ten  5^de     Det Prins René I de ieëste Pejjer Prins is dae ziene zoon opvolgtj.

Ten  6^de     Det De Hanebatse väör ‘t 2^dje jaor op rie eine Prins in hun midde höbbe.

Ten  7^de     Det d’r gein beer ónaafgesjuumdj moog waere doorgegaeve.

Ten  8^ste    Det weer deze Vastelaovendj regelmaotig de vogel aafsjete.

Ten  9^de     Det de biljart weer drek weurtj aafgestèldj naodet Prins René I d’rop haetj staon sprènge.

Ten 10^de     Det es ’t drök is, Prins René I gewuuen achter de tap te vènje is.

Ten 11^de     Det weer de Pejjer Vastelaovendj gaon viere ónger zien motto:

  “Mit álle vaere, geitj ‘t eine super sjieke sjoane Vastelaovendj waere !!!”

Vastelaovesvereniging de Aester Sjaelen Uul Pey