Proclamatie Jeugdprins Jonas I
Moge weer uch väörstèlle, bie de gratie gekaoze door de drie wieze, biegestange door Adjudant Vinnie, Vors René, Bestuur, leje vanne Raod van Èlf en de Pejjer Stars,oze 7dje Hoagheid, Jeugdprins Jonas I.
Óngersteundj door de muzikale klanke van oos eige ónvolpreze Hofkapel zal hae ós mit groate inzat en vol äövergave väörgaon in ’t Vastelaovesjaor 2025.
Jeugdprins Jonas I,
Eine hoagheid van Prinselikke aafkóms, wonendj oppe Brökwaeg in Pej. Gebaore op 16 december 2009 es zoon van Sanne en Marijke. Kleinzoon van Awd Prins Broer I. Zitj in ’t examejaor op ’t Connect College in Ech. In 2018 Jeugdprins gewaes bie de Scouting. Kömtj oet bèd väör frikkedelle en pizza en óm mit ziene hóndj Liv te wanjele. Is vriewilliger bie de Wienhaof en löptj es leiding róndj bie Kinder Vakantie Werk. Loestertj ’t ganse jaor door vastelaovesmeziek en speeltj zelf ouch nag gitaar. Truk al jaore mit in de Pejjer optoch. Boewdje in de coronatied al eine wage väör in de miniatuuroptoch.
Ederein dae dit huuertj, zal laeze, verstange haetj en good gevónje, det alles volges de regels en in ’t belang van eine sjoane Vastelaovendj, mót weite det:
Ten 1 e Det de Pejjer Vastelaovendj gevierdj weurtj door alles en ederein van Pej, Sjaelberg, ‘t Hènge en de Slek, mit óngersteuning vanne ganse Vastelaovesvereniging De Aester Sjaelen Uul.
Ten 2 e Det Jeugdprins Jonas I dit jaor in ein zwart rokkostuum in de optoch mit truktj.
Ten 3 e Det ‘t Connect College noe ‘n jaor eerder weurtj verboewdj.
Ten 4 e Det de Scouting noe naeve hun Prinsepaar nag eine Jeugdprins in hun midde haetj.
Ten 5 e Det Awd Prins Broer I, nao 26 jaor, eine waardige opvolger haetj in Jeugdprins Jonas I.
Ten 6 e Det de frikkedelle en pizza’s alvas groat kènne waere ingekoch.
Ten 7 e Det de Prinsewage dit jaor neet groat genóg kan zeen.
Ten 8 e Det de Pejjer Stars steingood zeen en mit Jeugdprins Jonas I door de vastelaovendj danse.
Ten 9 e Det de Vastelaovesmeziek noe noait mieë oet geitj.
Ten 10 e Det weer tót aswoonsdig gaon fieëste wie de bieëste.
Ten 11 e Det weer noe hieëlemaol los gaon ónger zien motto:
“Mit vastelaovendj en scouting in ‘t blood, ammezere weer ós steingood!”
W.G. vastelaovesvereniging De Aester Sjaelen Uul Pej.