Jeugdprins Ayrton I

Foto: Niels Golsteijn

Pej, 23 November 2019

Moge weer uch väörstèlle, bie de gratie gekaoze door drie wieze van de jeugdcommissie. Alle Aesters en Aesterlingskes van Sjaelberg,’t Hènge, Slek en zeker van Pej biegestange door Adjudant Justin, Prins Roel I, Adjudant Funs,Vors Ton, Ambassadeur, Bestuur, lede vanne Raod van Èlf en de Hofkapel, zoawaor oze 2^dje Jeugdprins, Prins Ayrton I, dae uch mit groate inzat en vol äövergave väör zal gaon in ’t Vastelaovesjaor 2020, óngersteuntj door de muzikale klanke van oos eige ónvolpreze Hofkapel.

Jeugdprins Ayrton I,

Gebaore op 31 december 2002 en is noe bienao in de laeftied van 17 jaor.

Wonendj op de Isabellastraot in Pej.

Is de zoon van Mark en Sandra Stevens en is ènnigs kèndj thoes.

Zitj op ’t Mosa-er (St.Jansberg) en volgtj de opleiding van Lasser.

Is lid van Sjötterie St. Antonius Slek en speeltj dao in ’t korps es slaagwèrker.

Zien groatste hobby’s zeen Crosse, Fieëste en hae haetj ein groate passie väör vrachwages.

Löstj gaer ein stökske abrikozeflaai en väör ein bruuedje kebab kóns se ‘m altied wakker make, det sluitj d’r zeker neet aaf.

Is ’t naefke en paetekèndj van awd Prins Guido I.

Ederein dae dit huuertj, zal laeze, verstange haetj en good gevónje, det alles volges de regels en in ’t belang van eine sjoane Vastelaovendj, mót weite det:

Ten  1^e   Det de Pejjer Vastelaovendj gevierdj weurtj door de minse vanne Slek, Hènge, Sjaelberg en Pej, mit óngersteuning vanne ganse Vastelaovesvereniging De Aester Sjaelen Uul.

Ten  2^e   Det ich de 2^dje Jeugdprins moog zeen van Vastelaovesvereniging De Aester Sjaelen Uul.

Ten  3^e   Det ich väör goje raod altied terech kan bie miene paeterome awd Prins Guido I.               

Ten  4^e  Det ich same mit miene adjudant Justin flink gaas gaon gaeve.

Ten  5^e   Det Sjötterie St. Antonius mit die daag eine angere slaagwèrker mót gaon zeuke.

Ten  6^e   Det ich same mit mien femilie d’r eine sjoane vastelaovendj van gaon make, mit spas en plezeer.

Ten  7^e   Det de passie väör de vrachwages effe mit de vastelaovendj mót wieke.

Ten  8^e  Det ich mitte vastelaovendj de sjoal hieëlemaol toe las zaodet ze weite det ich de Jeugdprins bön van VV De Aester Sjaelen Uul.

Ten  9^e  Det ich bie eder evenement richtig gaas gaon gaeve en ich mich äöveral door haer cross.

Ten 10^e Det ich mich daonao lekker de hónger kan stille mit ein bruuedje kebab.

Ten 11^e  Det ich noe gaon aafsloete mit miene spreuk:

“Vrachwages zeen mien lös en laeve,
Noe gaon weer èns richtig gaas gaeve” 

W.G. Vastelaovesvereniging De Aester Sjaelen Uul Pej.