Proclamatie Jeugdprins Justin I
Foto: ZIPS fotografie
Pej, 18 November 2018
Moge weer uch väörstèlle, bie de gratie gekaoze door de drie wieze
van de jeugdcommissie. Alle Aesters en Aesterlingskes van Pej, de
Slek,’t Hènge en zeker van Sjaelberg biegestange door Adjudant
Bryan, Prins Funs I,Vors Ton, Ambassadeur, Bestuur, lede vanne
Raod van Èlf en de Hofkapel, zoawaor oze 1ste Jeugdprins, Prins
Justin I, dae uch mit groate inzat en vol äövergave väör zal gaon
in ’t Vastelaovesjaor 2019, óngersteuntj door de muzikale klanke
van oos eige ónvolpreze Hofkapel.
Jeugsprins Justin I
Gebaore op 27 november en wonendj op Sjaelberg in de laeftied van 14 jaor.
Is de zoon van René en Ilona Iedema en haetj nag 2 kleinere zösterkes.
Zitj op ’t Connect College in Ech en zitj in ’t examejaor vmbo gemengde Leerweg.
Ein van zien groatste hobby’s is Badminton, mer wiltj net wie ziene pap kómmendj jaor gewaerdraeger waere van Sjötterie Wilhelmina Hènge.
In ziene vrieje tied duitj d’r nag gaer gamen, fotografere en zeker Formule I kieke.
Laevesgeneter, väöral van friet, pizza en frikkedellebruuedjes die sluitj d´r zeker neet aaf.
Dereleefhöbber in hert en nere.
Ederein dae dit huuertj, zal laeze, verstange haetj en good gevónje, det alles volges de regels en in ’t belang van eine sjoane Vastelaovendj, mót weite det:
Ten 1e Det de Pejjer Vastelaovendj gevierdj weurtj door de minse vanne Slek, Hènge, Sjaelberg en Pej, mit óngersteuning vanne ganse Vastelaovesvereniging De Aester Sjaelen Uul.
Ten 2e Det ich de 1ste Jeugdprins moog zeen van Vastelaovesvereniging De Aester Sjaelen Uul.
Ten 3e Det óndanks de wèt van de privacy d’r gewuuen foto’s van Jeugdprins Justin I gemaaktj moge waere.
Ten 4e Det väör mich mitte vastelaovendj ’t gamen en badmintonne op eine lieëge drempel kómme te staon.
Ten 5e Det ederein oppe Kleefstraot de vastelaovesvlag al boete kan hange väör Jeugdprins Justin I.
Ten 6e Det ich de 1ste Jeugdprins bön mit ein echte dansgroep óm mich haer.
Ten 7e Det ’t niks oet maaktj of de drempels hoag of lieëg zeen, de vastelaovendj truktj door ´t ganse Pejjer Prinseriek.
Ten 8e Det friet, frikkedellebruuedjes en pizza zeker de Vastelaoveskos waere mit dees daag väör Prins Justin I.
Ten 9e Det bie edere flitspaol ingehaoldj moog waere.
Ten 10e Det ich same mit miene adjudant Bryan eine sjoane Vastelaovendjmoog belaeve in dit jubileumjaor.
Ten 11e Det ich noe gaon aafsloete mit miene spreuk:
“Drempels of Flitspaole,
Mit de vastelaovendj bön ich neet in te haole”
W.G. Vastelaovesvereniging De Aester Sjaelen Uul Pej