Proclamatie Jeugdprins Thibor I
Foto: ZIPS Fotografie
Moge weer uch väörstèlle, bie de gratie gekaoze door drie wieze van de jeugdcommissie. Alle Aesters en Aesterlingskes van Sjaelberg,’t Hènge, Slek en zeker van Pej biegestange door Adjudant Ayrton en Raf, Prins Chris I, Adjudant Roel, Vors Ton, Ambassadeur, Bestuur, lede vanne Raod van Èlf en de Hofkapel, zoawaor oze 5dje Jeugdprins, Prins Thibor I, dae uch mit groate inzat en vol äövergave väör zal gaon in ’t Vastelaovesjaor 2023, óngersteuntj door de muzikale klanke van oos eige ónvolpreze Hofkapel.
Jeugdprins Thibor I,
Gebaore op 27 Mieërt 2007 en haetj noe de laeftied van 15 jaor.
Wonendj op de Dörpstraot in Pej.
Is de zoon van Roy en Lenny Wagemans en haetj nag eine aojere broor Boris.
Zitj op de Havo en geitj hienao de opleiding Boewkunde volge, want Techniek en Boewkunde zeen zien passie.
Zien hobby’s zeen de Scouting Maria Goretti, voetbaltj bie de JO17-2 van Rios‘31 en haetj gezwómme bie ZV Patrick.
Is zieër behulpzaam, creatief en stuitj altied väör angere klaor.
Kèntj good klusse en waat d’r bedènktj, kan d’r ouch mit zien henj make.
Kampioen in frikkedelle bakke, vuurke staoke en kan good knuip lègke.
Ederein dae dit huuertj, zal laeze, verstange haetj en good gevónje, det alles volges de regels en in ’t belang van eine sjoane Vastelaovendj, mót weite det:
Ten 1e Det de Pejjer Vastelaovendj gevierdj weurtj door
de minse vanne Slek, Hènge, Sjaelberg en Pej, mit
óngersteuning vanne ganse Vastelaovesvereniging
De Aester Sjaelen Uul.
Ten 2e Det ich de 3dje Jeugdprins moog zeen van
Vastelaovesvereniging De Aester Sjaelen Uul.
Ten 3e Det ich mit dees vastelaovsdaag de tuikes aanein gaon knuipe.
Ten 4e Det ich nao twieë jaor niks mieë geheim hoof te haoje en de nuje
Jeugdprins bön van De Aester Sjaelen Uul.
Ten 5e Det de voetbalshirtjes van de JO17-2 van Rios’31 vanaaf noe Road,
Gael, Greun kluuere.
Ten 6e Det ich mit de vastelaovendj ’t vuurke flink zal gaon opstaoke.
Ten 7e Det bie Jeugdprins Thibor I ’t vastelaovesblood al kriebeltj vanaaf
zien prille jeugd.
Ten 8e Det bie Rios’31 en de Scouting de vastelaovesvlag weer opgehange
kan waere väör Jeugdprins Thibor I.
Ten 9e Det w’r dit jaor de vastelaovendj weer moge viere op volle krach.
Ten 10e Det ederein gezóndj blif en det w`r weer eine sjoane vastelaovendj
moge belaeve.
Ten 11e Det ich noe gaon aafsloete mit miene spreuk:
‘Vastelaovendj lang op gewach,
Dit jaor viere w’r ‘t op volle krach’
W.G. Vastelaovesvereniging De Aester Sjaelen Uul Pej.