Proclamatie Prins Chris I
Foto: ZIPS fotografie
Moge weer uch väörstèlle, bie de gratie gekaoze door de drie wieze. Alle Aesters en Aesterlingskes van Sjaelberg, Slek,’t Hènge en zeker van Pej, biegestange door Adjudant Roel, Vors Ton, Ambassadeur, Bestuur, lede vanne Raod van Èlf en de Hofkapel, zoawaor oze 67ste dooslustige Hoagheid, Prins Chris I, dae uch mit groate inzat en vol äövergave väör zal gaon in ’t Vastelaovesjaor 2020, óngersteuntj door de muzikale klanke van oos eige ónvolpreze Hofkapel.
Prins Chris I,
Waalgebaore Edelachbare Excellentie, mit gevolg ein Majesteit, wonendj in Pej.
Is gebaore op 30 Mieërt 1964 in ’t riek van de Winkbülle es zoon van Jan en Bep van Bemmel. Getrouwdj en woontj same mit Léonne oppe aoj Hoagveldjswaeg. Vader van twieë kènjer, namelik Mark en Loes. Is de broor van zien twieë zusse Jeanine en Clemence. Wirktj bie Technomed es Product Development Engineer in Mestreech Airport.
Lid van v.v .De Aester Sjaelen Uul, is väörzitter van ’t Sjlagercomité en lid van ’t Buhnecomité en Vrouwluujzitting. Is bestuurslid van R.I.O.S.’31, leider van de Veterane en leider van ’t twieëdj van R.I.O.S.’31. Duitj gaer kampere oppe camping in Spanje en barbecuetj ’t leefs mit kaole of brikètte es d’r mèr vuurke kan staoke. Van Metal en Rock meziek geitj d’r hieëlemaol oet zien daak en mit Modelboew-tanks speeltj d’r ouch gaer.
Ederein dae dit huuertj, zal laeze, verstange haetj en good gevónje, det alles volges de regels en in ’t belang van eine sjoane Vastelaovendj, mót weite det:
Ten 1e Det de Pejjer Vastelaovendj gevierdj weurtj door de minse van de Slek, Sjaelberg, ’t Hènge en Pej mit óngersteuning vanne ganse vastelaovesvereniging De Aester Sjaelen Uul.
Ten 2e Det de vlagge en balonne oppe Hoagveldjswaeg weer opgehange kónne waere.
Ten 3e Det weer neet allein, mer same de vastelaovendj viere in oos Pejjer Prinseriek.
Ten 4e Det op ’t werk van Prins Chris Ide vastelaovesvlag van v.v. De Aester Sjaelen Uul lang moog blieve wappere.
Ten 5e Det Prins Chris I same mit ’t Sjlagercomité , dit jaor väör eine angere opzèt höbbe gekaoze.
Ten 6e Det R.I.O.S. ’31 mit Prins Chris I eine Hoagheid haetj bönne de vereniging.
Ten 7e Det inne vastelaovestied de metal en rock meziek efkes weurtj vervange door vastelaovesmeziek
Ten 8e Det de voetbalveljer bie R.I.O.S.’31 mitte vastelaovendj Road, Gael en Greun kluuere.
Ten 9e Det de modelboew-wages dees döl daag ane kantj blieve staon.
Ten 10e Det Prins Chris I en de ganse femilie eine sjoane vastelaovendj moge belaeve.
Ten 11e Det weer noe gaon aafsloete ónger zien motto:
“Van bóntje aovendj tót op ’t plein,
vastelaovendj viers se neet allein”
W.G. vastelaovesvereniging De Aester Sjaelen Uul Pej.